上星期六係 Arisa last call , 安格斯提議去蘭桂芳食泰菜 , 於是我地一班人就去左老蘭度蒲 !
講真 , 咁大個女 , 我都係第一次夜晚落老蘭SOHO區飲野 !
始終人太多 , 又貴 , 我又唔飲得 !
反而以前 , 晏晝時份 , 成日幫我姑姑去永祥買脆卜卜燒肉食!
又或者 , 等姑姑放工 , 帶我食好野!所以Fat Angelo's ,我都只係n年前黎soho區食過!
最記得一次食尼泊爾餐,太辣 , 食到嘴都朣 , 但好好食 !
--------------------------------------------
當日下晝, 我先同哥仔 , 去左"姨媽家姐" IKEA 度食 lunch。
雖然選擇少 , 但樣樣都幾好食 , 不過以SIZE黎講 , 去食 TEA 會好D !
我地叫左兩件杏仁餅 ($7@), 一碟細肉丸($10) , 一碟燴羊肉($29) , 一支奇異果汁 ($10)。
另外 d Cake 比較甜 , 尤其是有朱古力0係面既 , 兩個人一件就差唔多 !
=============================
夜晚既然黎到蘭桂芳 , Soho 區, 我地由阿dam發牌 , 搵過第二間更有feel 既 , 最後揀左一間開放式餐廳 "Jaspa's" 。
(呢幅相網上搵既)(地址: 中環蘇豪士丹頓街28-30號地下, tel: 2869 0733)
呢間食聯合國既 , 法意為主 , 有D似Ruby , 但價錢更合理!
我地九個人 , 叫左好多個菜, 當中有 :
Thai Beef Salad , Caesar Salad, 茄汁長通粉, 蝦意粉, 白酒燴雞肉 , 羊仔扒 , 肉眼扒 , 墨西哥素菜卷配飯等等。
每碟都好大好大 , 連 starters 都好大份 ! 最緊要係d 配菜, 不論薯仔 , 矮瓜同南瓜 , 都好新鮮好好食 ! 大家都讚不絕口 !
由於上菜快 , 又由Lui Lui帶領 , 食得好快好急 , 快到我要呀停 ! 連想影張相既時間都無 , 我忍唔住大呀 "食慢d 得唔得呀 !"
咁多好野食 , 緊係要慢慢歎啦!
不過當中對間餐廳既服務有d保留。
最初 , 一去到佢地講明要九點半交檯 , 由於當時都只係七點幾 , 食兩個鐘差唔多啦 , 所以無問題 。
間餐廳大半做鬼佬生意 , 連等我地張檯既都係鬼鬼。
佢地先安排個香港人serve我地 ,可能因無order 野飲, 只係叫 iced water, 所以佢嘴藐藐 , 但見佢地上菜快 , 反應快 , 感覺還算好...
大概九點鬆 , 我地食得七七八八 , 個waiter 用左硬崩崩既口吻對我地講 :
"你地九點半交檯架 ! , 仲要唔要d 甜品呀 ?"
Arisa忍唔住對佢講:" 而家九點咋喎 , 唔洗啦 !"
我地對於佢說話技巧同服務態度有d質疑 !
其實我地見隔離檯既甜品好靚 , 尤其是俾我見到個朱古力軟心cake , 大大個 , 好似好好食 , 但聽到佢咁講 , 咩胃口都無晒啦 !
之後仲連水都無再加比我地....唉 ! 臨尾香!
--------------------------------------------------
不過 , 是次埋單每人百三 , 令我地覺得佢一定計錯數 !
因為上次去 "el cid" 都食左成二百五 !! 仲要每碟細細碟 , 食唔飽 !
今次樣樣大大碟 , 淨係兩個main courses羊仔扒加牛眼扒都每樣百五啦 !
而家埋單 $1160 , 嘩 ! 唔識計 ! 到最後 , 大家都食得好開心 !
============================
食完飯,大家都係忍唔住去左蘭桂芳...
始終我地都係拖男帶女 , 地下open 位唔係太岩 。
我地搵左間清bar , 上左二樓 , 幾個坐低慢慢玩 !
間bar 既 services 唔錯 , 又可以自己買零食上去 , 又有個大電視俾人睇有線 , 自成一角 , 不亦樂乎 !但玩乜? 睇下 ...
新學識玩斗地主既哥仔緊係想大家分享下 , 但羅左兩副牌都係無joker既 , 都要認命玩骰鐘!
平時唔玩骰鐘 , 因唔想飲啤酒 ! Arisa話唔罰飲酒 , 罰夾花生 , 無問題 !
起初大家都唔知佢玩乜, 但當有人輸 , 要夾耳仔時 , 大家就知錯 !
原來夾得唔好 , 就好似夾衣夾一樣咁痛 !
我地每人只叫左一杯cocktail ,又無飲啤酒 , 咁就玩左幾個鐘 , 越夜越多人 , 我地都唔好意思坐咁耐。
如果大家可以玩夜d , 夾到成面花生 , 走去"七仔"買野食都幾好玩!
==================
p.s.多謝AK , 件衫人人讚呀 !
沒有留言:
發佈留言