多謝SiDnEy!!!

我非常愛我部手機SX313, 佢原名叫703SH

由佢28/7/2005 0係日本面世0個一刻 , 我已SET定目標 , 對自己講 , 終有一日 , '佢'一定會成囊中物。

我望穿秋水，等等等等......9/2005香港終於出啦 , 仲有我至愛既色 , 但差唔多要$4000 ?! 有無搞錯 ! 日本賣緊既唔洗$1000呀! 之後既日子,一經過smartone,就企定定,比哥仔死抆爛抆都唔捨得走!

14/11/05 我記得當日dayoff, 同哥仔食完飯去左喜帖街影相(可睇相簿),經過修頓對面既smartone,見佢居然無貼價錢牌,覺得唔對路,立即問下個Sales,果然跌價!!之後既事,大家都估得到啦,過左唔夠兩日,部機已在我手中啦!!

不過都買得貴,我入貨時係$2280,過左兩星期就跌到$1980....

所以大家可以得閒同我玩下3G (....我同哥仔已經日對夜對,用唔到d 3G分鐘.....>00< )

------------------------------------------------------------------------------

今次點解大字標題多謝Sidney呢.......

星期五晚係 ladys night , 我同 Sidney 撇低身邊0個個 , 去左 Physical 玩 。

揀左最鐘意既利舞台 , 因為得女無仔 , 而0個晚仲有靚女教練 Kitty 教 kickbox , 就算唔上堂 , 睇佢教都開心d!

同平時一樣玩完就去焗身同沖涼 , 但沖沖下涼突然間諗起....."部電話呢? "

我立刻大呀 : " Sindey , 弊啦 ! 我部電話好似漏0係部機度!!"

Sindey : "0下?咩機呀?"

"樓梯機呀 , 應該頭先掛住羅走本雜誌 , 而唔記得羅番部電話 ! "

Sindey : "會唔會已經袋番落褲袋 , 放左落LOCKER呀?"

"睇黎唔會啦....."

Sindey : "我差唔多沖完 , 我幫你去睇下 , 唔洗驚 , 你個話掛住個膠波波 , 咁特別 , 應該無人羅掛?"

當時我仲洗緊頭,成頭泡, 都唔知點算 !

Sindey 好好 , 知我手腳慢 , 立刻幫我出去搵。

佢首先嘗試打番個電話 , 睇下會唔會0係 locker ,

Sidney 企0係個locker面前聽唔到入面有電話響 , 心知不妙 ! '拿拿淋' 換埋衫跑落去大場。

而我真係心亂如麻 , 沖完即刻跳出0黎check locker...唔見呀...大單啦...!!

好彩隔左一陣 , 我見 Sindey 施施然行番黎 , 手上'渣'住我電話...

原來呢半個鐘 , 個電話孤零零被人遺棄0係部樓梯機 , 無人理佢...