06-06-06五星級的家...Park Island

3/6 係哥仔生日 , 哥仔請左幾日Al, 玩下抖下KITKAT 下!

由於小女仲係處於 ' 坐食山崩' , 所以呢幾日AL留港消費...

我地反而正日咩都無做 , 第二日同左阿SAN 佢地食餐慒!

首先下午去左旺角警察遊樂會對面既 ' 阿郭咖哩 '

講真 , 呢間餐廳比我印象真麻麻 , 食物名係特別既,如 PTU咖哩,味道ok啦 , 價錢平 。但服務呢... 可能人手不夠 ? 可能用新人 ? 總算叫幫襯過啦..

我地打完保齡後, 晚上去左間西班牙餐廳慶祝...多謝晒 ! 要大家破費! 因為真係好貴呀!

行過諾士佛台揀餐廳時 , 我地仲以為呢間西班牙菜 , 最多似又一城0個間意大利餐廳既價錢 , 點知點菜時先知中計 , 連杯水都另計...

不過呢間el cid 既西班牙菜係值得推介!(只要你預左每位差不多要$300~$500)

我地當晚點左海鮮頭盤 , 芝士菠菜卷 , 燒豬仔 , 鹽焗魚 , 焗海鮮飯等。

佢既蠔非常鮮甜;燒豬仔皮脆肉香,但始終廣東燒味正d!

菠菜卷既卷皮鬆脆 , 芝味濃 , 但size 細 , 應該話同普通既春卷一樣大...

鹽焗魚賣相最正 ! 味最好 ! 一出場見侍應推出一個小鹽山 , 然後用鎚仔扑開 , 條魚咸咸地 , 好好味!

最初大家都驚食唔飽 , 到最後上場既海鮮飯解決左我地既煩惱!size大 , 份量多!

開初每款菜都細細碟 , 而呢個海鮮飯剛好夠8 人食, (我記得大蝦剛有8隻)。

最後大家都唔捨得再叫甜品 , 索性走去麻布食雪糕 。不過我'裝'過 el cid 既 menu , d 甜品應該錯, 仲有心太軟添 !

=====================

靚嗎 ? 不過欠靚天色 ! 6/6終於去左 Park Island(珀麗灣) 。

唔係睇樓 , 而係去東灣海灘影相。係雜誌見到介紹 , 覺得好似幾好feel , 又好似好方便 , 無論青衣 , 葵芳 , 中環 , 過去都係廿分鐘。我地先到葵芳食米線 , 之後係新都會搭專線巴。

我地到新都會,於門口兜左一個圈 , 都唔見個小巴站, 入去問商場服務員 , 發生以下既對話...

朱 : "請問去珀麗灣既小巴係邊度搭嫁?"

服務員甲 :" 你地可以由呢度轉左, 搭......兩層電梯, KFC 側邊既門口就係行..."

我同哥仔一路行一路大笑, 因為我地一聽到佢講要"搭..."都以為佢話要搭車先到, 嘻嘻!

原來架專線巴係單層巴士 , 而唔係綠頂小巴, 搭左十幾分鐘就到 , 真係好快!

一到步就發現環境好! 地方清幽!整個屋苑自成一角 , 非常"私家" (成個島喎)

最唔扺得既係佢已經有私人會所 , 有好靚既室內外泳池 , 全部對住青馬橋, 屋苑隔離就係東灣海灘 , 有救生員0個隻! 就好似屋苑既私沙灘咁!鐘意游水既我如果住呢度就發啦!!

我地只係用左$3搭船由珀麗灣到荃灣 (好扺搭,係去離島既快船) 。慢慢由碼頭(即西鐵站)行去吉之島 , 再到沙咀道既一間老牌据扒餐廳 "沙樂美"。

上圖係我既大蝦牛柳 , 大家見到有幾厚!果然名不虛傳!平靚正!除左大件夾扺食之外 , 質素比金鳳及大興好!

"沙樂美" 位於沙咀道渣打隔離 , 值得再去呀!!