書展 , 狗狗展 & 動漫展

今年去左好多展 , 書展, 寵物展 , 動漫展都去晒 , 原來做展覽d 人真係好搵錢!

年年入書展 , 除左趁虛 , 主要目的為麥0麥而去, 雖然年年去親都唔幫襯 !(因為要買既閒時已經買左) 但仍然好似唔去睇下唔安樂 ! 不過今年麥0麥攤位得兩個 , 好似比以往遜色 , 但始終人頭湧湧 , 我迫左好耐先至入到去睇下。

順帶一提 , 我要再一次多謝 witchgar !!

話說基本上我有齊所有麥0麥漫畫! 原因只因witchgar!

仲記得那年書展仍陪著witchgar 去買麥0麥書 , 原來佢儲埋儲埋襯我生日時成箱送比我呢個又孤寒但又鐘情麥0麥既小粉絲呢 !!好感動呢 !嘻嘻 !

放心!而家成箱書仔仲係好安全 , 我住到邊就跟到我去邊!

=========================

29號要送機 , 咁岩有寵物展於博覽館舉行 , 仲有埋免費車由沙田到會場 , 便順理成章諗住先去狗狗展 , 再到機場!當日好大雨呀 , 人又多 , 排左半粒鐘先上車 , 不過由於好多狗仔陪你排 , 點都唔悶呀 !

不過到會場時太晏 , 食埋野都差不多4點 , 所以無入狗展就去搭機鐵到機場啦!

p.s.博覽館d 野食平均 $40 唔連飲品 , 質素好似迪士尼 , 下次記住食左野先去!!

由於29號去唔到 , 第二日就食埋晏先去 , 今次大鑊啦 ! 由於星期日 , 又好天 , 我地等左好耐好耐先至輪到我地 , 大概都有成粒幾鐘...都係孤寒累事...

寵物展基本上係狗狗展 ...因九成人帶既都係狗 , 我所坐既接駁車又係成車狗 , 全場我只遇見到三隻貓 , 兩條蜥蝪 , 其他都係狗 ...

早知我帶埋阿鼠去...

在場攤位大半都係賣寵物食品 , 狗仔可以試食 , 我仲見有幫狗仔睇相既攤位?!又見到警犬及狗醫生表演 。

唔知下年再搞時 , 免費車會唔會由旅遊巴改為城巴 , 而有更多人帶唔同既寵物去玩?睇黎我都要訓練下我隻倉鼠 , 等我下年威下先...

===============================

動漫展我係最後一日去 , 今年同往年形式好唔同 , 多左好多野 , 但d 野唔係好岩我 , 係三個展中最無趣既...

以往動漫展既佈局同書展好類似 , 所以唔知係咪太似會少人去, 今年又加左d game show , band show , 又加左d地攤 , 好似年宵咁 !(呢樣係我無預到有既!) 主打似乎係 cosplay , 一入場既時候已經有兩個Lolita陪我排隊 , 間唔中會有d cos-player行過 !當然入到場就滿場都係 ! 場內仲有cosplay 服裝租借 !

相信下年都唔洗再預我啦...