為食星期天part1 山頂Burger King

星期五正當我頭痕諗緊"今晚煮乜??"既時候 , 一個電話打救我!

哥仔 :"喂 , Sidney 叫我地今晚一齊上山頂去食burger king喎!"

我答 : "好呀!緊係好啦!等左好耐,終於有得食 !"

岩岩開張時我已經扭計要食 , 話不如就哥仔放工去食, 但一直無人陪 , 佢唔肯呢!我地次次去親機場都遇唔岩 , 反而去到第二度硬係會有餐食到burger king !

本來當日下晏仲落大雨 , 哥仔都講明到五點幾仲係咁大雨就唔去 , 好彩天宮造美 , 一天都光晒! 所以夜晚我地分頭上山 , 約左係burger king見!

----------------------

當一上巴士見到咁多人 , 我就同哥仔講 : "全部都去burger king 食架!"

去到山頂 , 好似旺角咁旺! 上到bk , 預我所料 , 坐滿人 !

不過我地都係等左一 陣就有位!今次我地比佢隻小辣椒吸引 , 幫哥仔叫左set spicy whopper 加大,仲要係檸茶!我就加左個細 spicy whopper,再加洋蔥圈!

Alan 兩公婆就一人一個set !

-----------

唔... 裝修好吸引!但食物呢....

我地平時食慣double cheese , 最緊要係d牛肉又番又多汁!但今次我地感得d牛肉好乾身 , 無咩肉汁 , 好渣呢 ! 洋蔥圈都無咁好食 !話晒始終成四十幾蚊個餐喎...

我地去韓國同泰國食bk 都一樣食得好開心 , 搵到同一樣既感覺呢,但呢度就跌晒watt啦!

睇黎下一次飛都要去禁區既 bk 走一轉先!

---------------------------

呢張係阿兜話一定要影!

事原而家既望遠鏡又新又靚 , 所以會收你$5服務費 , 我仲記得以前都係$1!!但大家有無發現到什麼?

無錯 , 佢好先進咁用左八達通 !

但最重要既係八達通個位置係岩岩好 ,岩岩係你pat pat位 !!(由Alan 發現!)

所以如果你習慣放銀包落褲袋 , 去到山頂你要小心啦 !

正所謂 "聽到嘟一聲 , 停低你至精 !"

既然已經嘟左 , 仲唔爭取時間, 睇埋hk既靚景!

-------------------------

同麥兜影左好多靚相 , 得閒又去相簿度睇下啦!